Cariyos Pengalaman

Cariyos pengalaman menika kadadosan saking 2 tembung inggih menika cariyos saha pengalaman. Cariyos tegesipun kandha kang ngemot lelakon. Pengalaman inggih menika kedadosan ingkang nate dipunlampahi. Dados, cariyos pengalaman inggih menika lelakon ingkang sampun nate dipunlampahi saha dipunandharaken kanthi lisan saha tulis.

Jinis cariyos pengalaman menika wonten kathah. Ing bab menika ingkang badhe kaandharaken inggih menika jinising cariyos pengalaman ing masarakat limrahipun kados menapa. jinising cariyos pengalaman wonten 5 inggih menika cariyos pengalaman lucu, cariyos pengalaman bingah, cariyos pengalaman sedhih, cariyos pengalaman aneh saha cariyos pengalaman ngajrih-ngajrihi.

1.      Cariyos pengalaman lucu

Pengalaman lucu inggih menika kedadosan ingkang nate dipunlampahi dening tiyang, ndadosaken tiyang kasebut menapa malih tiyang sanes saged gumujeng. Cariyos pengalaman lucu inggih menika cariyos pengalaman ingkang ndadosaken tiyang ingkang maos utawi mirengaken gumujeng, ngraosaken bingah.

2.      Cariyos pengalaman bingah (seneng)

Pengalaman bingah inggih menika kadadosan ingkang nate dipunlampahi dening tiyang, ndadosaken tiyang kasebut menapa malih tiyang sanes saged ngraosaken bingah. Cariyos pengalaman bingah inggih menika cariyos pengalaman ingkang ndadosaken tiyang ingkang maos utawi mirengaken saged ngraosaken bingah.

3.      Cariyos pengalaman sedhih

Pengalaman sedhih inggih menika kadadosan ingkang nate dipunlampahi dening tiyang, ndadosaken tiyang kasebut menapa malih tiyang sanes saged ngraosaken sedhih. Cariyos pengalaman sedhih inggih menika cariyos pengalaman ingkang ndadosaken tiyang ingkang maos utawi mirengaken saged ngraosaken sedhih.

4.      Cariyos pengalaman aneh

Cariyos pengalaman aneh inggih menika cariyos pengalaman ingkang ndadosaken tiyang ingkang maos utawi mirengaken saged ngraosaken keanehan. cariyos kasebut ing antawisipun nyata kaliyan ghaib.

5.      Cariyos pengalaman ingkang ngajrih-ngajrihi

Cariyos pengalaman ingkang ngajrih-ngajrihi inggih menika cariyos pengalaman ingkang ndadosaken tiyang ingkang maos utawi mireng saged dheg-dhegan utawi ajrih.

Saderengipun kita damel cariyos pengalaman, kita kedah nggatosaken caranipun damel cariyos pengalaman. Ancasipun supados kita gampil anggenipun damel cariyos pengalaman. Langkah-langkah ingkang kedah dipungatosaken inggih menika:

a.       Ngemut-emut kadadosan ingkang badhe dipuncariyosaken.

b.      Nyusun cengkorongan cariyos pengalaman

c.       Ngembangaken cengkorongan cariyos dados cariyos pengalaman.

d.      Nyariyosaken cariyos pengalaman kanthi lancar.

e.       Paring pesan/kesan saking cariyos pengalaman kasebut.

1.        Pedoman ingkang dipunginakaken kangge damel cengkorongan cariyos pengalaman

Saderengipun kita damel cariyos pengalaman, kita kedah damel cengkorongan. Ginanipun cengkorongan supados gampil anggenipun damel cariyos pengalaman, saged urut runtut. Cengkorongan cariyos pengalaman inggih menika:

Ngginakaken unsur 5W + 1H:

a.       Sinten kemawon ingkang kalebet ing cariyos pengalaman.

b.      Pengalaman bab menapa ingkang nate dipunlampahi.

c.       Wonten pundi papan anggenipun kadadosan kasebut lumampah.

d.      Kapan kadadosan kasebut lumampah.

e.       Kenging menapa pengalaman kasebut dados pengalaman ingkang berkesan.

f.        Kadospundi urut-urutaning kadadosan kasebut.

2.        Bab-bab ingkang kedah dipungatosaken nalika nyariosaken pengalaman

Menawi kita badhe nyariyosaken cariyos pengalaman, kita kedah nggatosaken bab-bab ingkang kedah dipungatosaken nalika nyariyosaken pengalaman. Bab-bab ingkang kedah dipungatosaken nalika nyariyosaken pengalaman inggih menika:

a.       Ngemut-emut urutaning cariyos.

b.      Ngginakaken basa ingkang leres, cetha saha gampil dipunmangertosi.

c.       Anggenipun cariyos kanthi ekspresi saha intonasi ingkang cetha.

d.      Nyariyosaken piwulang moral ingkang saged kapendhet saking cariyos kasebut.

Kanggone wong sing ngrasuk agama Islam, jam telu isuk iku wektune ngadhep sing gawe urip. Kuwi adate, ya adate wong sing pancen duwe padatan sing kaya mangkono. Ning beda meneh karo Yu Marni uga semahe, solat wengi iku malah ora diwiwiti jam telu nanging jam siji bengi, mergane jam telu dheweke kudu wis dhasaran ing Pasar Sentul njajakne sega lan wedhange.

Yu Marni lan semahe iku pancen uripe rada rekasa, omahe wae isih ngontrak kepara ya ciyut. Apa meneh duwe anak lima, kuwi kabeh ya isih padha sekolah. Nanging Yu Marni ora tau sambat karo kahanan uripe, sing penting bisa nguripi anak-anake supaya dadi uwong sing mesthi ora kaya dheweke saiki. Mula beda karo biyasane, Yu Marni ngrasa ora tentrem, kaya kesusu anggone nata dagangane kaya-kaya ana sing arep medhayoh.